حياتي الجامعية: نادي التصوير و معرض العين للكتاب!

by - 4:49 م




صباح\مساء الخير للناس الجميلة♥♥♥.
بوست اليوم يديد من نوعَة ؛ وقبل ما ابدا فيه بخبركم
عن هالنوع من البوستات ( حياتي الجامعيّة ) !
بيكون تحت هالعنوان كل تجاربي او حياتي في الجامعَة ،
( يوميات جامعية ، رحلات الجامعَة ، نادي التصوير ، مشواري الجامعي
تخصصي ، و تغطيات جامعية ثانية و ان شاءالله تخرّجي )
وهذا اول بوست تحت هالعنوان ، وهو عن رحلتي مع نادي التصوير
للتصوير في معرض العين الدولي للكتاب
♥♥

قبل ما نبدا انا طالبة في جامعة الإمارات♥.
تخصصي : اتصال جماهيري ؛ مسار علاقات عامّة و إعلان





نبدا يلا؟♥♥♥.

نادي التصوير :
نادي التصوير مشتركة فيه من فترة طويلة لكن كنت ساحبة على النادي تماماً
ما احضر فعاليات ولا اروح رحلات معاهم و اساساً ما اعرف البنات المشتركات
غير أسماء اللي سجلتني في النادي♥.

كنت دايماً اتعذر وما اروح، ما اعرف ليش صراحةً بس ما كنت متحمسّه له ابداً

يوماً ما و تحديداً يوم الثلاثاء تاريخ ٢٠\٩ رمستني اسماء بخصوص رحلة التصوير هذي
كانت مهمّتنا نروح نصور الاطفال اللي بيحضرون المعرض و نطبع الصور لهم مجاناً
وافقت لان الثلاثاء اصلاً انا اوف ، و قلت شي احبه ليش لاء؟ و تجربة يديده خلنّي اجرب !

♥♥♥.





كنت متحمسّة وايد لان اسماء بتكون وياي و لأنها بعد اول رحلة مع النادي
والفكرة اساساً جميلة، بس ف نفس الوقت كنت متوتره شوي لان ما اعرف بنات
النادي♥.

المهم يا يوم الثلاثاء المُنتظر وانا راقدة من بدري ومتحمسّة و مجهزّه الكام وكل شي
وصلت الجامعة بدري بعد ، شفت بنات النادي بس ما خذت عليهم وايد !
بس اول ما وصلنا المعرض خذنا ع بعض وايد و طاحت الميانة ع طول.




في البداية كان الوضع فوضوي توهقّنا شوي، اللاب مافيه فوتوشوب عشان نحط الصور في فريم
و الفريم اساساً مب طايع يتحمّل على اللاب! ف توترنا وما عرفنا نتصرّف لين عطونا باسوورد
النتّ،  خليت الدريول اييب لابي من البيت و انحّل الوضع جزئياً و بدينا نصّور 📸.




لكن اللي ما حسبنا له حساب، ان الصور ما طاعت تطبع عدل حاولنا نعدّل المقاسات
لكن ابداً ما كانت راضية تتعدلّ! و الناس تتريا و المعلمات يتريون صور طلابهم !
و اوراق الصور تروح الزبالة على الفاضي، كل شوي نقولهم روحو خذو لفة و تعالو
ياخذون لفة ويرجعون و بعدها الطابعة زيّ الزفت، وعاد اليهال ابداً مافيهم صبر 😂.
متخيلين كميّة النحاسة؟.
بس الحمدلله انجزنا في هاليوم رغم كل العقبات اللي فيه!





عقب ما تعدّل الوضع مشت الامور زيّ القشطة ؛ كنا نصور و اليهال كل شويّ
يقولولنا : أبله أبله أبله ! الله؟ أبله مين؟ انا حتى بعدني ما تخرّجت
تخيلو جي أحجام صغيرة ومن كل صوب : أبله أبله أبله . . كان الشعور حلو
مسويلي هيبة والله😌.

اليوم الثاني تعلّمنا من اخطاءنا و كان كل شي تمام ومشى الوضع زيّ  العسل !
صورنا صور أكثر و طبعنا صور أكثر بعد ، و الحمدلله كان يوم جميل وايد ♥.


من الاشياء الحلوه اللي صارت لي في هالتجربة:
اول شي تغّيرت وجهة نظري تجاه اليهّال من عمر ٤ سنوات ، قبل ما كنت اتحملهم
احسهم كائنات غلسة شوي😗.
ف هالتجربة احس حبيتهم ناس صُغننّة وكيوتنس والله ! بعضهم ذكروني بنفسي يوم كنت ف الروضة .



الشي الثاني هو اني قويت شخصيتي شوي و خليت المستحى على صوب، كنت اتعامل مع المعلمات
و الاطفال و بعض الزوار اللي يستفسرون و مع صحفي يا يسأل عن فكرتنا و شو نسوي ؟
بكل اريحية و ثقة♥. 

المرّة الاولى كان شي مستحيل اني اروح بدون اسماء لاني ما اعرف غيرها ،
المره الثانية كانت بتروح ؛ قمت الصبح لقيت مسج منها انها ما بتروح ، كنت متلبسه ومخلصه بس باقي اطلع من البيت ، البنات ف هاليوم كانو غير عن اليوم اللي قبله فـ قلت خلاص ما بروح! ما اعرف حدّ
الحمدلله ان اختي موجوده وقالت روحي دام انج متحمسّه واذا على البنات بتتعرفين عليهم ترا !

وحمدلله اني سمعت كلامها و رحت تعرفت على البنات و اشتغلنا مع بعض وكلهم ينحبون والله♥♥!
مب الا ينحبون واااااااايد ينحبون، رجعوني لايام التصور و الاحتراف من زمان عن الانستا ..
غالباً انزل تصوير الايفون ، بس من شفت حماسهم و تصويرهم اشتقت و رجعت انزل صور بالكام !
♥♥





الشي الثالث كلام الناس و تشجيعهم خصوصاً يوم يعرفون انه تطوّع مب مادّة ولا مشروع تخرج!
واايد ناس سمعونا كلام ايجابي و يحمّس ، ووايد ناس طلبو ان نروح نصور لهم في مدارسهم و مؤسساتهم و خذو ارقام الجامعة و الايميلات عشان يتواصلون معانا .


واحلى شي صار، زيارة رئيس هيئة ابوظبي للسياحة حق البوث مالنا ! سالونا عن تخصصاتنا و كم سنة
باقي لنا و بعدها طرشو لنا واحد و قال نبا السي في مالكم حتى لو انكم هب خريجات!

يالله والله شعور جميل جداً ، ان في ناس تقدر هالشي مع انه وايد بسيط
من كثر الكلام الايجابي اللي سمعتَه ! حسيت بطاقة ايجابية لو اوزعّها على
هل الامارات كلهم ما بتخلص.





عقب ما خلصنا شوي من الشغل ومن بدا المعرض يفضى
رحنا نشوف الكتب وناخذ ؛ عن نفسي مسكت عمري وماخذت
الا كتابين لان عندي كتب وايد بعدني ما خلصّتها
خذت كتاب تثريب للكاتب سلطان الموسى غني عن التعريف
قريت كتابه اقوم قيلاً و وايد حبيته و عشان جي خذت هذا

الكتاب الثاني بالانجلش ما قاومت الرسومات اللي فيه مع انه للاطفال
فيه وايد قصص مصوّره و شكله يفتح النفس ف خذته♥♥♥.






اخر شي :
احس مستحيل تتوفر لي فُرصة مثل هذي الفرصة مره ثانية و ارفضها ،
وايد استانست بهالتجربة والله ، كل شي فيها كان جميل حتى وهقتنا في أول يوم
سوّت جو و طعم ثاني♥♥.

اكتشفت انّ لو شاركت ف مثل هالنشاطات بكون صداقات اكثر و بتعرف على ناس اكثر 
بقوي شخصيتي و بكسب خبرة في التعامل مع الناس
واخر شي اكيد بستانس و بكوّن ذكريات وايد حلوه♥♥♥♥♥.

اصدقائي في السناب كانو متابعين كل شي أولّ ب أول
ف اللي حاب يتابعني في السناب هذا سنابي ( هنا أو february.23rd ) ♥♥.



نلقاكم في بوست قادم♥.

You May Also Like

2 التعليقات

  1. حبيت البوست، حسيت اني وياج في هذا اليوم. حلو انج تجاهلتي شعور الخوف و اصريتي انج تروحين، هالتجربه و غيرها من التجارب لو عطيتي نفسج فرصه بتقوي من شخصيتج و بتعطيج دافع انج تنجزين اكثر. اتمنى نشوف مثل هالبوستات فالمستقبل، موفقه xx

    ردحذف
  2. الله علوي ، تجربة ممتعة جداً 👌🏼
    فعلاً البدايات تكون فيها صعوبة بس بمجرد التجربة تتمنين لو إنك متشجعة من زمان ..
    حبيت ردة فعل الناس وتشجيعهم ، للأبد أحب الناس اللي يقدرون ويحفزون ، وانتو زكيد تستاهلون 🌻

    ردحذف